Аютамыр

Асқар Алтай (Асқар Құмарұлы Алпысбай) (1963 ж.) - жазушы, ҚР Жазушылар одағының мүшесі, «Алаш» халықаралық сыйлығының лауреаты. 1963 жылы 12 ақпанда Шығыс Қазақстан облысы, Зайсан қаласында дүниеге келген. ҚазПИ-ды (1984, қазіргі Абай атындағы ҚазҰПУ) аяқтаған соң, Алматы облысы Күрті аудандық «Шұғыла» газетінде тілші, С. Мұқанов мұражай-үйінде кіші ғылыми қызметкер, Қазақ теледидары «Алатау» бағдарламасында жауапты редактор, бөлім меңгерушісі болған. 1989-1994 жж. - «Жұлдыз» журналының әдеби сын бөлімінде редактор, бөлім меңгерушісі, 1994-1995 жж. «Ер-Дәулет» ақпараттық агенттігінде Бас редактордың орынбасары, 1995-1998 жж. ҚР Қаржы Министрлігінің «Қаржы-қаражат» журналында Бас редактордың орынбасары, Бас редактор, 1998-2004 жж. «Атамұра» баспасында жетекші редактор қызметін атқарған. 2004 жылдан – «Арда» баспасының бас директоры. Отыздан астам шығарманың авторы. Олардың қатарында әңгіме, повесть пен романдар да бар: «Қызыл бөлтірік», «Қара бура», «Қаладағы құтпандар», «Жолаушы (Оқырманның әңгімесі)», «Қыр мен қала хикаялары» (1998 ж.),  «Алтай новелласы» (2001 ж.),  «Казино» ( 2008 ж.),  «Киллер сауысқан» (2013 ж.),  «Сират» (2014 ж.), «Алтай балладасы» (2017 ж.), «Дегелеңдегі қызыл күн», «Туажат»  (2018 ж.), «Былғары табыт» (2022), «Аютамыр» (2022). Оның шығармалары Англия, Түркия, Қытай және Ресейде жарияланған. «Алаш» халықаралық сыйлығының лауреаты (2001), Франц Кафки атындағы алтын медаль (2011), Т. Айбергенов атындағы сыйлықтың иегері (1999), халықаралық Сорос Қоры сайысының жеңімпазы (1996). «Құрмет» орденімен марапатталған (2017).